अन्नदाता सुखी भव सामाजिक संस्था (रजि ) ही संस्था टाटा मेमोरीयल हॉस्पिटल, परळ येथे बाहेरगावाहून आलेल्या आणि कॅन्सर वर उपचार घेत असणाऱ्या, पेशंट्स आणि त्याचे नातेवाईक, यांना दररोज संध्याकाळी मोफत जेवण देते. हे रूग्ण व त्यांचे कुटुंबीय उपचारादरम्यान पदपथांवर पथाऱ्या पसरून राहतात. त्यांना किमान एक वेळ तरी घरी शिजवलेले, ताजे, साधे जेवण मिळावे या हेतूने जय अनिल होलमुखे या तरुणाने 2013 मध्ये या कार्याची सुरूवात केली.
आभाळाला भिडलेले अन्नधान्याचे भाव लक्षात घेता, सुमारे 150 ते 200 लोकांना रोज किमान आमटी, भात व भाजी चपाती पुरवणे हे सोपे नव्हते. जयच्या आई सविताबाई होलमुखे यांनी हे शिवधनुष्य पेलण्यासाठी पुढाकार घेतला. सुमारे 14 किलो तांदळाचा भात व 6 किलो डाळीची आमटी त्या रोज घरी बनवतात. कडधान्याची उसळ व चपात्याही बनवल्या जातात. जयचे संपूर्ण कुटुंब आणि त्याच्या कामाचे महत्त्व लक्षात घेता आलेले स्वयंसेवक व मित्र यात आपला वाटा उचलतात. जेव्हा शक्य होईल तेव्हा केळी व बिस्कीटांचेही वाटप केले जाते, जे सकाळी नाश्त्यासाठी रूग्णांना उपयोगी पडते. जेवणाचे वाटप करायला संपूर्ण मुंबईतून ठरवलेल्या दिवशी स्वयंसेवक टाटा हॉस्पिटलला पोचतात. कित्येक तरूण आपला वाढदिवस अन्नदान करून साजरा करतात. अनेक कुटुंबे आपल्या जिवलगांच्या स्मृतिप्रीत्यर्थ या कार्यात यथाशक्ती मदत करतात. तरीही दिवसेंदिवस वाढत चाललेली रूग्णांची संख्या पाहता लोक सहभागातून मिळालेल्या देणग्या पुरेशा होत नाहीत. वस्तू आणि आर्थिक स्वरूपात मदत स्वीकारली जाते आणि रूग्णांपर्यंत पोचवण्यात येते.

हे कार्य लोक सहभागामधून होत आहे, संस्था केवळ निमित्त मात्र आहे अशी आमची धारणा आहे.

तरी या कार्यात खंड पडू नये म्हणून खारीचा वाटा उचलावा अशी विनंती आहे 🙏